Dr.H.Suhendra Yusuf MA Rektor ka 6 Uninus Periode 2016 -2020
Dr.H.Suhendra Yusuf,MA salaku Pembantu Rektor I Universitas Islam Nusantara (Uninus) ti mimiti poe Rebo 20 Januari 2016 nyangking kalungguhan salaku rektor ka 6 Uninus pikeun mangsa periode 2016-2020. Dina poe harita saperti diberitakeun Koran Giwangkara diistrenan Ketua Yayasan Islam Nusantara Letjen TNI (Purn) H.Achmad Roestandi,SH sakalian bareng jeung pejabat rengrenganna ngawengku Wakil Rektor I : Dr.H.Husen Saeful Insan,M.MPd,Wakil Rektor II : Dr.Akhmad Mudrikah M.Pd,Wakil Rektor III : Drs.H.Gatot Yusuf Effendi,MM,Wakil Rektor IV : Prof.Dr.Abdorakhman Ginting.Ph.D,M.Ed lumangsung di rohangan Program Pascasarjana,kampus Uninus Jl.Soekarno-Hatta No.530 Bandung.
Suhendra Yusuf ngaganti rektor heubeul Dr.H.Didin Wahidin,M.Pd nu kiwari mancen jabatan salaku Direktur Kemahasiswaan Kementrian Riset Teknologi & Pendidikan Tinggi (Kemenristek Dikti)..Pikeun civitas akademika Uninus tangtuna moal hamo bireuk deui pada mikawanoh ka Suhendra Yusuf kulantaran lian ti geus lila jadi tenaga edukatif atawa dosen tetap Yayasan Islam Nusantara ngadosenan di Fakultas Keguruan Ilmu Pendidikam (FKIP) Uninus jeung Program Pascasarjana Uninus oge geus lila nyaeta 14 taun ngajabat salaku Pembantu Rektor I Uninus ti taun 2002. Lian ti sapooena sibuk di kampus Suhendra Yusuf lulusan S1 IKIP Bandung,S2 UPI Bandung jeung S3 Ohio University Amerika turta miluan training pendidikan di sababaraha nagara oge loba kagiatan sejenna nyaeta pernah jadi konsultan The Word Bank (Bank Dunia), konsultan di widang pendidikan,nulis sababaraha buku pendidikan dimedalkeun penerbit di Bandung jeung Jakarta sarta sering miluan seminar sarta nepikeun presentasi diantarana di Unesco.
“Ku diisttrenanna rektor anyar ieu diharepkeun mawa Uninus leuwih maju. Simkuring percaya bakal leuwih mekar,sok komo rektor anyar ieu geus loba cukup nimba pangalaman salila di Uninus dibarengan elmu pangaweruh kasang tukangna lulusan ti luar negeri “.ceuk Achmad Roestandi. Suhendra Yusuf sarengsena diistrenan netelakeun bakal ngalaksanakeun tugas amanah ieu sahade-hadena nu tangtuna sangkan Uninus beuki mekar perlu ayana rojongan ti sababaraha pihak di kampus. “ Minangka tarekah anyar nyaeta kepemimpinan di Uninus ngagunakeun sistem anyar nyaeta ngaran Pembantu Rektor diganti jadi Wakil Rektor “.pokna. Jeroning kitu lian ti istrenan rektor nyigeung kagiatan sejenna dilaksanakeun di kampus Uninus Kepala Humas Uninus Drs.Maman Nurdjaman netelakeun dina tangal 20 Desember 2015 Ikatan Keluarga Alumni (IKA) Uninus ngayakeun Musyawarah Besar (Mubes) ku alpukahna Ketua Panitia H.Nukaddis Abdul Nasher,SE,MM nu dieusi acara seminar nasional jeung pemilihan Ketua IKA Uninus,hasilna Dr.Danny Kusumapradja,SH,M.Hum kapilih jadi Ketuana pikeun periode 2015-2020 ngaganti Ketua heubeul Dr.H.Dada Rosada,SH,M.Si mantan walikota Bandung nu geus rengse mangsa jabatanna. Danny Kusumapraja nyaeta alumni Fakultas Hukum Uninus pernah nyangking jabatan salaku Kakanwil Kemenkumham Jabar sarta Kepala Badan Pengembangan Sumber Daya Manusia (BPSDM) Kementerian Hukum dan HAM Republik Indonesia.(Suherman.S).-
