Hilman Firmansyah,S.Ip,M.AP : Perpustakaan Sakola Perlu Diatur Manajemen Nu Hade
Kepala Unit Pelayanan Teknis (UPT) Perpustakan Universitas Pasundan (Unpas) Bandung Hilman Firmansyah,S.Ip,M.AP netelakeun perpustakaan sakola mibanda peranan nu kacida penting pisan pikeun ngaronjatkeun minat maca sarta kamampuan belajar siswa,kulantaran di perpustakaan aya kumpulan ilmu jeung nilai nu bisa diaplikasikeun sarta dimekarkeun ku para siswa. “Ngeunaan perpustakaan ieu teh tangtuna perlu diatur atawa dikokolakeun ku manajemen perpustakaan nu hade nyaeta ku fungsi-fungsi manajemen nu bisa diterapkeun di perpustakaan sakola ti mimiti sagala rupa komponen ngawengku perencanaan,pengorganisasian,pengarahan nepi ka pengendalian evaluasi kerja perpustakaan. “.pokna waktu nepikeun materina “ Manajemen Perpustakaan Sekolah “ dihareupeun 150 urang peserta Pelatihan Perpustakaan Sekolah SMU/MA/SMK Sa- Jawa Barat lumangsung 29 April 2013 di Gedong Mandala Saba R.Otto Iskandardinata kampus Unpas ,Jl.Setiabudi No.193 Bandung.
Dina ieu kasempetan lian ti diluuhan Rektor Unpas Prof.Dr.Ir.H.Eddy Jusuf,M.Si,M.Kom ngadugikeun biantarana sakalian muka acara pelatihan oge Dra.Herta Anggia Pengurus Daerah Ikatan Perpustakaan Propinsi Jawa Barat nu oge salaku Pustakawan Bapusipda Jawa Barat ngadugikeun materi “ Katalogisasi dan Klasifikasi “ jeung Drs.H.Mahmudin,S.Ip Kepala Perpustakaan ITB, salaku Ketua II Forum Perpustakaan Perguruan Tinggi (FPPT) Provinsi Jabar ngadugikeun materi “ Sistem Informasi Perpustakaan Di Era Digital” sarta Ketua Panitia ieu kagiatan pelatihan Neneng Nurhayani S.Sos.
Numutkeun Hilman Firmansyah saperti diberitakeun Koran Giwangkara perpustakaan di sakola bisa disebut jantungna sakola nu nyirikeun alus gorengna sakola bisa ditinggali tina kaayaan perpustakaannnana kukituna manajemen perpustakaan kacida penting dilakukeun sangkan lian ti tujuan perpustakaan saperti nu diamanatkeun ku Undang-Undang Nomor 43 Tahun 2007 ngeunaan Perpustakaan bisa karealisasikeun nyaeta tujuanna mere layanan ka pemustaka,ngaronjantkeun resep maca ,sarta keur nambahan wawasan turta pangaweruh pikeun minterkeun kahirupan bangsa oge kalalaksanakeunnana fungsi perpustakaan nu sacara umum perpustakaan mibanda fungsi salaku wahana pendidikan,pelestarian,informasi jeung rekreasi pikeun ngaronjatkeun kapinteran jeung kaberdayaan bangsa.
Nyakitu deui perpustakaan sakola mibanda opat fungsi umum nyaeta edukatif,informatif,kreasi jeung riset atawa penelitian sederhana. Fungsi edukatif maksudna sacara sagemblengna fasiltas jeung sarana nu aya di perpustakaan sakola,utamana koleksi jeung nu dikokolakeunnana loba ngabantu para siswa sakola pikeun belajar jeung meunang kamampuan dasar dina mentrasfer konsep-konsep pengetahuan ,dijadikeun bekel pikahareupeun ku para siswa . Ari fungsi informatif mah nu aya pakuat pakaitna jeung disadiaanna koleksi nu sifatna mere nyaho kana hal-hal nu aya hubunganna sarta kapentingan para siswa jeung guru.
“Sedengkeun fungsi riset jeung penelitian nyaeta koleksi perpustakaan sakola bisa dijadikeun bahan pikeun ngabantu dilakukeunnana penelitian sederhana sarta fungsi rekreasi nyaeta disadiakeunnana koleksi sifatna ringan saperti surat kabar,majalah umum,buku-buku fiksi jeung sajaba ti eta,diharepkeun bisa ngahibur nu macana “.ceuk Hilman Firmansyah alumni S2 Kebijakan Publik Unpas tahun 2012 oge kiwari aktif salaku Sekretaris Pengurus Daerah Ikatan Perpustakaan Indonesia (IPI) Jabar sarta Ketua I Forum Perpustakaan Perguruan Tinggi (FPPT) Jabar(Suherman.S).-
